حنفي وحسان وحكايات الميدان بقلم الاديب عبد الرحمن الحناوي

مئوية بالشعر العامي في ذكري ثورة 25 يناير سنة 2011 . ( الذكري الثامنة ) .

بعنوان :

( حنفي وحسان وحكايات الميدان ) .

تأليف أ / عبد الرحمن الحناوي . ********************************

سيب فاسك يا ( عبد العال ) وانتا كمان يا ( حسان ) *

واجري معانا يلا ياخال بيقولوا ثورة في الميدان *

فين الثورة يا ( متقال ) ؟ يلا نعدي علي (حمدان) *

الثوار من بدري هناك في التحرير جوه الميدان *

بيقولوا هات اللي معاك يلا بسرعة طيروا طيران *

هتلاقوا ناس كتير هناك فلاح عامل أو فنان *

موظف حكومة طبيب ومهندسين كمان *

سواق حلاق مدرس وتلامذه معاه كمان *

الكل بيهتف وينادي يسقط نظام فاسدان *

هو دا الميدان يا صاحبي بشر من كل الألوان *

اللي ماسك يافطة عليها صورة تشبه الشيطان *

بيقول : ارحل يلا ارحل مالكش بينا تاني مكان *

وآدي أفندي لابس بدلة وشايلينه ناس جدعان *

بيقول كلام جد مقنع وصوته مزلزل الأركان *

وشباب الثورة حواليه والزحمة ماليه المكان *

والكل منصت إليه حكيم دا ولا فصيح لسان *

بص هناك يا (متقال) ست دي ولا انا غلطان *

فيه شباب كتير قدامها رجالة وستات كمان *

اسمع بتقول للناس إيه : عايزين راس التعبان *

الكيل طفح بينا يا بيه وانتا عن الفقير غفلان *

شايف يا عبد العال مسرح كبير هناك وصوان *

وأغاني وأناشيد وطنية كنا بنسمعها زمان *

(ع الدوار .. ع الدوار) بيحمسوا بيها الشجعان *

دي ثورة بجد يا (متولي) يا مصر ليكي الأمان *

وآدي ناس جاية تصلي بعد ما رفعوا الأذان *

جيب العواقب سليمة رحمتك يا حنان *

ما عادش للشعب قيمة والمال في إيد السلطان *

السلطة وأصحاب الثروة اتحكموا في البلدان *

فاكرين الشعب ساكت قال راضي بالحرمان *

الشعب صاحب سلطة مش جاي طالب إحسان *

الفساد عالحكومة غطي لا عدل ولا ميزان *

والثروة اتجوزت السلطة جواز عمي وطرشان *

زودوا من غضب الشعب خلوه فقير عدمان *

وعاثوا في الأرض فسادا عايشين زي السكران *

يا مصر دا انتي عظيمة وشعبك عظيم كمان *

أطياف الشعب الحزينة شايفينها جوه الميدان *

وممثلين في السيما فيه منهم شوية كمان *

دي ثورة بجد يا (حنفي) والشرطة سايبة المكان *

أنا سامع ضرب نار نستخبي في الدكان *

هوا فيه دكان فاتح دول قفلوا من زمان *

دي ثورة بجد يا صاحبي وآدي قنابل الدخان *

مسيلة للدموع ومغطية سما الميدان *

يا شعب مصر الثورة بالدم بدأت تبان *

والورد اللي فتح جوه جناين مصر هان *

هان علي كل خسيس قتل شباب جدعان *

الدم المصري رخيص في نظركم يا غيلان *

والشلة جنب الرئيس عاملين زي الحيتان *

بيظهروا له التقديس ودوه في خبر كان *

بكرة كلهم يتحاكموا ويدوقوا ذل وخذلان *

ويتحاكم كل قاتل ضرب نار في المليان *

بص يا(حنفي) فوقنا طيارة بتدور دوران *

باين عليها بتصور كل حركة في الميدان *

أنا خايف هي اللي تكون هتضرب في الشجعان *

اتورطنا ولا إيه ؟ تعالي ندور علي ( حسان ) *

يمكن راح عند المتحف يستخبي من الدخان *

خلق كتير جوه المتحف غزو دا ولا عدوان *

مش ثوار دول يا صاحبي دي عقولهم تاهت توهان *

اللي بينهب واللي بيسرق آثار أشكال وألوان *

واللي فاكر نفسه بيفهم ثورة إيه يا جدعان *

خليك بس انتا في نفسك مش هنسيب الميدان *

الطاغي لازم يرحل وبكره نحاكم الفسدان *

يلا ننادي بأعلي صوت انتا فين يا ( حسان ) *

فيه لمه هناك تعالي واحد باين مات كمان *

مين يعرفه يا رجاله بص معايا يا (حمدان ) *

جثة مين يلا تعالي دا فيه شبه من ( حسان ) *

آه . آه وألف آه ضربوك بالنار يا ( حسان ) *

دمك مش هيروح هدر والحرية للشجعان *

جيت تطالب بالحرية وتدافع عن الشقيان *

بقيت انتا قضية وروحك لسه في الميدان *

الليل داخل علينا مش هنروح يا جدعان *

يلا نطمن أهالينا وبكرة نكمل في الميدان *

تروح ليه انتا صغير اوعي يقولوا عليك هربان *

دي الشجاعة ليها ناسها وانتا أبدا مش جبان *

الثورة لسه بتبتدي أنا سامع آيات قرءان *

وشيخ واقف ملتحي يخطب من أعلي مكان *

باللغة العربية الفصحي شكله سلفي يا ( حمدان ) *

والسياسة في نظره كانت رجس من عمل الشيطان *

دلوقتي الأمور بانت وانكشف اللي كان خفيان *

شعللي يا شرارة الثورة واحرقي أثر الطغيان *

جايين لك من أول مرة والأعداد ف زيادة الآن *

لاجل بلدنا مصرالحرة تتخلص من السلطان *

طلع النهار وابتدت شمس الحرية تبان *

واحنا حالفين نكمل من غير ما نسيب المكان *

مر يومين وتلاتة ولا حدش قال بردان *

نور الحرية بيتولد وبكره يدفي الميدان *

وف لحظة الشعب كله صمت صمت الحملان *

اسمعوا حالا يا جماعة هيذيعوا أهم بيان *

الكل واقف ساكت مستني صدور البيان *

وبعد شوية ظهر عالشاشة اللي جوه الميدان *

شخصية الكل عارفها وبدأ يقرأ البيان *

( الرئيس قرر يتنحي ويترك الرئاسة كمان ) *

والمجلس العسكري هوا اللي يقود البلدان * الزغاريد طلعت والفرحة عمت أرجاء الميدان *

والأحرار وقفوا يهنوا وياخدوا بعض بالأحضان *

والثوار بدأوا يغنوا ويعيدوا أمجاد زمان *

خلعوا رئيس زي ما اتمنوا قوة إيه يا ولدان *

من غير حرب يلا اتهنوا هيعلي بيكم البنيان *

ابنوا مصر جديدة أساسها رخا وسلام وأمان *

**** **** **** **** **** ****

نشرت يوم الجمعة الموافق 25 من يناير سنة 2019 .

********************************

» توثيق قصيد تحت عنوان (حنفي وحسان وحكايات الميدان )بقلم الشاعر #عبد الرحمن فتحي الحناوي
» نص بعنوان حنفى _ وحسان وحكايات الميدان بقلم الشاعر/ عبد الرحمن الحناوى
» كفايه لوم وعتاب بقلم الاديب عبد الرحمن الحناوي
» هجره نبينا من ديوان الاديب عبد الرحمن الحناوي
» ***** لما تلاقي***** بقلم عبد الرحمن الحناوي