٢ - ( لما تلاقي )
بشعر العامية المصرية .
-----------------------------
لما تمشي تكلم نفسك والناس كلها تسمع حسك *
يبقى دا إيه ... يبقى اسمه القهر ** 
لما تحاول تشتري لحمه وجيبك فاضي من غير لزمه *
يبقى دا إيه ... يبقى اسمه الفقر **
لما تحاول تشتري جزمه تلاقي نفسك داخل أزمه * 
يبقى دا إيه ... يبقي راح الشهر **
لما تبات ما انتاش دافيان وفي عز البرد المرض الوان *
يبقى دا إيه ... يبقى اسمه المر ** 
****   ****   ****   ****   ****   **** 
لما تكون عايش في الدنيا علشان بوسي بس وسونيا *
يبقى دا إيه ... يبقى الخسران **
لما تضيع وقتك كله في قالوا وعادوا ومين باصين له *
يبقى دا إيه ... يبقى الخذلان ** 
لما تبات الحسره في عينك والدمعه ما طفتش أنينك *
يبقى دا إيه ... يبقى الحرمان **
****   ****   ****   ****   ****   ****
لما تعيش الوحده المره كاتم غيظك كده كام مره *
يبقى دا إيه  ... يبقى اسمه مرار **  
لما اولادك يبعدوا عنك وتدور ع اللي يشيل همك *
يبقى دا إيه  .... يبقى استهتار **
لما تلاقي دموع علي خدك نزلت مره غصبن عنك *
يبقى دا إيه ... يبقى انكسار ** 
****   ****   ****   ****   ****   ****
بقلم أ / عبد الرحمن فتحي الحناوي .
من مصر .
نشرت في يوم الإثنين الموافق ٢٥ / ٢ / ٢٠١٩ .
***********************************