اصل الحكاية
كل شيء اتولد
لازم يكون ليه نهاية
الحكاية هي هي
نفس النهاية والبداية
الحكاية فينا دايرة
واحنا بنرسم دواير
يوم بنحزن ويوم بنفرح
ومعاهم العمر داير
وما دام العمر بيجري بينا
واحنا عالشط وعالسفينة
ليه بنعمل الغلط
ونقول يا حيطة دارينا
ونحدف غيرنا بالظلط
وفيها ايه لو بيه بنينا
فيها ايه لو ابقى مركب
وتبقي ليا فجرو فنار
فيها ايه لو كوكبي
يلقى عندك مدار ودار
لو في يوم جمعنا الفلك
ما كان جعان في يوم هلك
كنا حققنا العدالة
كنا عدلنا الميزان
كانت تموت بنا الندالة
ويترد لينا الامان
كان يسود بينا السلام
ويرجع لنا سرب الحمام
راجع معاه غصن الزيتون
ونهد الاسوار و السجون
نزرع مكانها الانسانية
ونخضر دنيتنا ديه
صحيح ده اللي في بالي
كلام يبان جد و مثالي
حلم ورسمته في خيالي
رسمته بنبض القلوب
عالم من غير ذنوب
مافيه دخان حروب
ولكنه وهم جميل
دايما قاتل . دايما قتيل
دايما قابيل. دايما هابيل
هي كده الحياة
فيها خير وفيها شر
فيها من زرع الحياة
وفيها واحد على
الموت اصر
خلقها رب العباد
دار ابتلاء وهناك ميعاد
ساعتها حيكون الحساب
ويرجع حق اللي اتظلم
وساعتها حيدوق العذاب
كل واحد في يوم ظلم
هي دي اصل الحكاية
خللي بالك من ختامك
وبص لنفسك في المراية
واوعى تنسى يوم قيامك
يحيى حسين 25 يناير2019
موضوع: أصل الحكاية... بقلم المبدع يحيى حسين 
السبت يونيو 20, 2020 12:06 am
