#من_ديوان_الحناوي
( كفاية لوم وعتاب )
قلبي الحجر داب وانصهر .. من كلمتين حلوين وياه *
لما قابلته وعرفت سيرته .. إزاي في يوم قلبي ينساه *
كلامه كله نبرة حنان
وصوته كله همسة كروان
ياريتني عرفته من زمان
وعوضني حبه سنين حرمان
قفلت قلبي وقلت مفيش
لا حب عايزه ولا تشويش
قابلته وقلت غيره مفيش
إزاي حبيته ما تسألنيش
من أول نظره ابتدت حكايتي
وصورته الحلوه غطت مرايتي
إداني عمره إداني كفايتي
أنا فداه هوا اللي وصايتي
جدع وشهم وعمره ما باعني
رماني بسهم وسهمه صابني
يعيش حزين لو يوم فبه سابني
عالعهد باقي وقلبه يساعني
يا ناس كفايه لوم وعتاب
هو اللي حب زي اللي داب !
الدنيا فتحت باب ورا باب
استنى ولا أدق الباب ؟
الفرحه كانت غايبه عني
وكان منايا من صغر سني
ألاقي روح جنبي تطمني
وصبحت خايفه لا يضيع مني
الشوق مخبي إيه وياه
دموع وحزن وكمان آه
غير حياتي دانا باهواه
لو ساب الدنيا روحي معاه
طول عمري والوحده رفيقي
والدنيا ساعدت على ضيقي
كتر الكلام نشف ريقي
فضلت صابره ودا حقيقي
هو اللي نور لي طريقي
**** **** **** ****
بقلم أ / عبد الرحمن فتحي الحناوي .
*************************
موضوع: كفايه لوم وعتاب بقلم الاديب عبد الرحمن الحناوي 
السبت أكتوبر 12, 2019 7:38 pm
