....حلم الشهيد...
بصي يما هقولك كلام ميتنسيش
بس يما إوعديني من النهاردة متزعليش
وادعيلي يما في كل وقت ومتعيطيش
كنت يما بحلم معاكي أكون عريس
وتزرغطيلي وتكحكيلي وتبخريني
وتدعي كل سكان البلد ومتسبيش
ولا طفل فيها يجي يشاركني فرحتي
والابتسامة. علي الوشوش متنتهيش
بس يما سامحيني إني مجتش أعيد عليكي
وأروي عيوني من حنانك و من نور عنيكي
بس يما علي فكرة يما مكدبتش عليكي
وحلمي معاكي نفذته ليكي ومخنتكيش
والكل حضر فرحتي في دفنتي مخذلتكيش
والكل كبر الله أكبر دا عريس زيه مفيش
دا مات شهيد عشان الكل كان لازم يعيش
زي اللي راحوا قبلي ولسه كمان هيروحوا بعدي
المهم عندي إسم مصر واسم سينا ميتمحيش
شفتي يما زفتي . شفتي حبايبي في دفنتي
شفتي الدعاء اللي اندعالي علي تربتي
سامحيني يما إني مدخلتش عليكي ببدلتي
زي كل مرة أجري عليكي وارمي يما شنطتي
وأخدك ف حضني وأمسح في كتفك دمعتي
بس أهو جيت بعد ماأديت ببسالة يما مهمتي
صحيح مجتش ماشي وكان غصب عني
أصل الشهادة دي رزق يما مبينشريش
بس اقولك .إطمني أنا ف مكانة لو تعرفيها
هتفرحيلي وتوزعي شربات الفرح علي كل اهلي وعزوتي..
بس أمانة يما تبلغي سلامي لصحابي ورفقتي
وكل أهل الساقية وخصوصا أهل حتتي
وتبوسيلي إيد خالي وخالتي وعمي و عمتي
وتعملولي يافطة كبيرة في مدخل قريتي
اكتبوا عليها. آخر كلامي .مت شجاع وماتركت دشمتي.
وانهي بقول الله
((ياآيتها النفس المطمئنة إرجعي إلي ربك راضية مرضية فادخلي في عبادي وادخلي جنتي))
.......................................................
إهداء إلي روح الشهيد البطل #عمر_القاضي
بقلمي /أنور محجوب