#من_ديوان_الحناوي
٤ - ( لما تلاقي )
بشعر العامية المصرية .
؛؛----------------؛؛--------------؛؛
١ - لما الحلم اللي في خيالك يجيب لك نهضه مش علي بالك *
يبقي دا إيه ... يبقي الأحلام *
٢ - لما الشارع يبقي يوماتي موفر ليا كل حاجاتي *
يبقي دا إيه ... يبقي الإكرام **
٣ - لما الدنيا تمد إيديها وتدي الشعب أحلي ما فيها *
يبقي دا إيه ... يبقي احلى ايام **
**** **** **** **** ****
٤ - لما الظابط يبدي أسفه علي تصرف ساء وصفه *
يبقي دا إيه ... يبقي انبهار **
٥ - لما نكون عايشين في دوله لا قوه لينا ولا حولا *
يبقي دا إيه ... يبقي احتقار **
٦ - لما تلاقي الحق معاك وعيون العدل ماهيش شايفاك *
يبقي دا إيه ... يبقي إضرار **
**** **** **** **** ****
٧ - لما المسؤول يفضل يرفع سعر الخدمة ويفضل يخدع *
يبقى دا إيه ... يبقى إصرار **
٨ - لما الغلبان يفضل يدفع بالميات ولا حد بيسمع *
يبقى دا إيه ... يبقى افتقار **
٩ - لما الأحوال كدا تدهور والفقرا يزيدوا أكتر واكتر *
يبقى دا إيه ... يبقى احتضار **
١٠ - لما الدم دا يبقي رخيص وكتر الهم دا يبقى ونيس *
يبقى دا إيه .... يبقى انتحار **
**** **** **** **** ****
بقلم أ / عبد الرحمن الحناوي .
من مصر .
نشرت يوم الجمعة الموافق ٢٩ / ٣ / ٢٠١٩
*****************************
موضوع: ( لما تلاقي) بقلم المبدع عبد الرحمن الحناوي 
الجمعة مارس 29, 2019 9:08 pm
