قلبي نازف من سنين
السبب جرحي القديم
لما صابني رمش عين
انكسر ضلعي السليم
انخرس مني اللسان
واللماضه ياسيدي فين
صوتها بيهز الكيان
ونابني رعشه في الايدين
بنت في غاية الجمال
فرسه ينقصها اللجام
الدلع حاضن دلال
والقمر قدم وسام
يوم سمعت منها كلمة
صوتها عذب زي سومه
روحت ضارب الف لخمة
تقولش قابلتني الحكومة
حتى ركبي ساعتها سابت
لما نور الوجه بان
والملامح مني شابت
العيون صابها الجنان
جوه مني في سؤال
الجميل ده ابن مين
حاجه اشبه بالخيال
وجهها وجه جنين
بس لون عيونها جنه
والكفوف متلونين
ورد متقلب في حنه
والخدود موردين
رسم في اخر الشياكه
يعني ولا تخطر في بالك
الطعامه والحياكه
يشبه النقش في خيالك
عدى البدر بحلاوته
بعد ماعطر هوايا
وانطبع صورة شقاوته
مين يفتش في النوايا
ومين يجيد فن القرايه
قمت ماشي وراه قوام
لجل موصل للحكايه
شكلها قصة غرام
او بدايات الروايه
المهم بسرعه جيتها
والجنان يخطر في بالي
شوفتها داخله لبيتها
والجواب بسرعه جالي
انها عايشه لواحدها
واسمها بصراحة سالي
قلت لازم اضم ايدها
واخطب الود في وريدها
بس سور الورد عالي
والخطر اصبح كبير
وهي قاعده في العلالي
بس يهون الكتير
والتعب لجل الحرير
قمت طالع قمت نازل
قمت واقع مــ السرير
وام العيال قالتلي خير
قلتلها خير ياستي خير
شكل بس الحلم خني
او في عيب في السرير
الفؤاد لساه يغني
برغم عني
هحلم والاحلام في بير
خالد الفرارجى