#من_ديوان_الحناوي
( #عيني_عليكي_يا_بيروت )
نسوا إن الكون له إله
عارف مين هما الطغاه
عارف مين أصحاب الشر
وعارف مين بيحب يضر
عارف مين شال الديناميت
وعارف أسرارهم في الببت
مين بس اللي في قلبه سواد
بيموت في الناس منكاد
حاقد على شعب في لبنان
ومش عايز النهضه تبان
كل ما يحصل أي تقدم
تلقى فرقه تلقى تشرذم
روح ورا روح عماله بتطلع
تفجير أسوأ من نار مدفع
والدنيا عماله بتولع
ولا خلت مبنى ولا مصنع
ناس بتقول دا صوت قنبله
خلا المينا دي مشعلله
وناس بتقول دا صوت صواريخ
جاي منين جاي م المريخ !!
عيني عليكي يا بيروت
شفتي بعينك رعب وموت
شفتي الساسه ف كل وادي
متحالفين مع أعدى أعادي
شفتي دمار ولا كان عالبال
شفتي خراب وضياع أموال
روح يا (جعجع ) روح يا (جميل)
وانتا يا (بري) شدوا الحيل
اجلسوا ويا (ميشيل عون)
شوفوا حل يكون مضمون
وما تنسوش أبدا (نصر الله)
و (جنبلاط) كمان بالمره
سجل في كتابك يا (دياب)
كل آراء وزرا ونواب
اسمع من رموز الشباب
واقبل أي لوم وعتاب
إنسوا مصالحكو الشخصيه
واتفقوا واتنازلوا شويه
لبنان كده هيضيع منكم
ما تخلوش خلافات بينكم
اللي عنده حل يا مرحب
يتفضل عمره ما حيتعب
كل الشعب حيمشي وراه
والنخبه راح تبقى معاه
بس بلاش مصالح شخصيه
تتعكر بيها سلامة النيه
عجبي عليك يا لبنان
ما كانش دا كله في الحسبان
إرحل إرحل يا فسدان
وخد معاك خاين غفلان
فيه مجموعه لازم ترحل
تسيب الحكم بس ما تزعل
التغيير مطلوب للنهضة
والناس كلها شايفه وشاهده
إرحم ربي أهالي لبنان
وعاقب كل خسيس وجبان
إمتى نشوف وحده عربيه
تخلي بلادنا حره قويه !!
-------------------------------
بقلم د / عبد الرحمن فتحي الحناوي .
من مصر .
الجمعة ٧ من أغسطس ( آب ) سنة ٢٠٢٠
موضوع: عيني عليكي يا بيروت بقلم المبدع عبد الرحمن فتحي الحناوي 
السبت أغسطس 08, 2020 4:52 pm
