#من_ديوان_الحناوي
#أغراب_تحت_سقف_واحد
بشعر العامية المصرية .
بنتك غريبه عنك وانتا حتبقى غريب
واخده موبايلها منك شايفه الأعاجيب
هندي كوري تقولك والأمريكاني رهيب
وشاغله وقتها كله ما بين أغاني تريب
وابنك في ركن لوحده بيقلب فيه ويجيب
في لعبه تموت فوري مفتون بها اللعيب
لعبه اسمها (حوت أزرق) تخلي البيت كئيب
**** **** **** ****
والأم شاغله بالها عالفيس نهار وليل
والأب يضرب كف على كف يادي الويل
في المطبخ جاي يلف على أي أكل يشيل
عايز يتغدى وعينه على رف خيره قليل
فين الطعام يا هانم أنا شغلي هد الحيل
سيبي شويه الموبايل قبل ما ييجي الليل
نفسنا ناكل أكله في البيت بشكل جميل
ونعوض اللي فاتنا ونحس بالتدليل
لكن صاحبتنا قالت أنا مهدودة الحيل
انا تعبانه وشايله بيتك دا كله شيل
إتغدى بره وجرب دا الأكل بره جميل
وهات معاك طباخه مسافة سواد الليل
تطبخلك كل ليله والليل دا لسه طويل
وفضلت ماسكه الموبايل مايله عليه ميل
يعمل صاحبنا إيه في الست دي العنتيل
غير إنه يكتم غيظه يشكي الهم التقيل
ويقول دي ست غريبه مالها أبدا مثيل
أغراب جوه البيت ! فين الزمن الجميل ؟
**** **** **** ****
الله يجازي ( الفيس ) واللي اخترع حكاياته
صعلوك ولا رئيس الكل تاه في ساحاته
بضغطة زر تدوس تبان لك كل حاجاته
شد عقول الناس ببرامجه وتطبيقاته
وباعد ما بين الأهل لكن دا له حسناته
خليك معاه بتوازن وارمي وراك سوءاته
دا الشخص لو يتهور يضيع ورا شهواته
**** **** **** ****
يا صاحب الفيس تهنا وتاه معانا خيالك
خليك علينا هين ما تسوقش فينا دلالك
واحجز ما بينا السيئ واظهر صلاح حالك
دا الحق واضح بين . صحصح وروق بالك
وميز ما بين السيئ واللي بيحفظ مالك
الفيس دا عالم تاني إياك تذيع أخبارك ؟
بكره الجهاز يتكلم يساومك على أسرارك
وتبقى ماشي تكلم خالك على إنه جارك
ولا تعرف اسم عمك ولا ليلك من نهارك
**** **** **** ****
احنا شعب لازم نتعلم الترشيد
في كل شئ طالع علينا لسه جديد
نترك منه السيئ وناخد اللي يفيد
لأن الفيس دا ميزته بيقرب البعيد
---------------------
بقلم د / عبد الرحمن فتحي الحناوي
من مصر .
السبت ٤ من يوليو سنة ٢٠٢٠
موضوع: أغراب تحت سقف واحد بقلم المبدع عبد الرحمن فتحي الحناوي 
السبت يوليو 04, 2020 3:59 pm
