شكون يفسر حلمتي بقلم الشاعر عبد الهادي ابو ياسر حنيف

‏
.شكون يفسر حلمتي
لي معجونة مدة
و مزال ماخمرات
و نڭول قصيدتي
لي فاضت مداد
كتبت شلا حروف
تنهد خاطري
و طلع تنهيدة طويلة
يتحسر على
شمعة لعمر
لي دمعاتها سالو
و كاس الزهر
فاض و عمر
وسيفتو دبالت
شكون يقرا كتابي
لمكتوب بمداد لوجع
حروفو خرجت معاني
خلات لعين غارقة تدمع
شكون يهبش
ديك الدات
لكاتبة غوتات
و رسمت خيالات
و تصرفت كلمات
مكتوبة مساوية
خارجة من الجوف حامية

عبدالهادي أبوياسر حنيف