طريق الريح
يا الداخل سوق.. غير سوقو
يا الجاني قوق.. بلا عروقو
يا الراكب فوق.. صداع بوقو
يا المكسي بخروق.. ومعلي شدوقو
وياك يغرك طولك.. وتنسي اصولك
وتحصد فالليالي سبولك.. قبل ما يصفار
راه الشربة فكاس البلار
الا كان ماها محرار.. ما يطفي عطشك
الرغبة والتحزار.. فغابة الكبار
ناس المنكار.. ما تعلي عرشك
ايوا عري على دراعك..وبيع ذاك اللي باعك
ترتاح من صداعك..وتشبع كرشك
شحال من شجرة بلا وراق..غطاتنا بغصانها
شحال منهم نعس وفاق..مدفي بحنانها
الدنيا ضراعة..كلها يلبسها ساعة
إلا عصات حفرة بلاعة
والا صفات تصبح مطواعة
غطي راسك من السمرة..يا الراكب طريق الريح
لا تيق فولد المرا..راك تولي غادي وتطيح
وخا تكون حلاوتو ثمرة..راه ينهرك بكلام قبيح
تبغي الهنا يرجع جمرة..ويقولها لك بلسان فصيح
لهيبها يحرق عدو وصديق..
وخا تكون خو او رفيق ..
راه يهجرك فوقت الضيق..
يتلوى ويغلق كل طريق..
تمة شوف انت باش تيق
بقلم إدريس لحمر