من وحي نصر أكتوبر العظيم . ( كل عيله فيها بطل ) **بقلم أ / عبد الرحمن فتحي الحناوي . من / مصر .

Admin المساهمات : 871 تاريخ التسجيل : 16/12/2018

من وحي نصر أكتوبر العظيم .
( كل عيله فيها بطل )
*********************
كل عيله فيها بطل حضر التهاني أو شهيد *
كل عيله قايله الوطن فوق الأماني وما نريد *
كل عيله شايله البلد كاتبه الأغاني والنشيد *
كل عيله ربت ولد ومقدماه مشروع شهيد *
والعزيمه جايبا المدد جايبا معاها توب جديد *
جايبا لينا ولاهل البلد نصر غالي شئ أكيد *
****************************
رجعت بيتك يا بطل منصور يشار لك بالبنان *
احكي وقول يا بطل ما فيش ما بينا حد جبان *
جنودنا دول هما الأمل بقوه زي حجر الصوان *
***************************
استنيتك لما ترجع تحكي البطوله في الميدان *
استنيتك مش بودع سر الرجوله في المكان *
استنيتك وقلت هاسمع الحكايه وكام بيان *
استنيتك ربي يعلم اشتقنالك من زمان *
استنيتك بطل يحلم والحلم دا حق الشجعان *
استتنينا نشوف عدوك تقتل فيه ولا هربان *
استنينا منك نصره تهز عرشه و الأركان *
تضرب فيه اقوى ضربه وتخليه يرجع خسران *
حطمت له أكبر اسطوره ادعاها من زمان *
وبقيت لوحدك في الصوره وكل شيء ييجي بأوان *
قرب مني يا بطل جهزت لك ورد ونيشان *
********************************
سمع الناس اللي جايه تحتفل بيك يا بطل *
قول لهم إيه القضيه و دورك إيه في اللي حصل *
قول لهم : أنا شفت ميه خارجه من بطن الجبل *
قول لهم شافت عينيه ضرب نار واحداث جلل *
قول لهم : أنا هان عليه كل شئ لاجل الأمل *
قول لهم : بدموع عينيه اللي كادت تتقفل *
شاهدت الموت بعينيه و ما همنيش اللي حصل *
شايل سلاحي بايديه وعدوي غارق في الخبل *
الحرب كانت ضرورية لكسر شوكة من زلل *
والضربه دي جايه قوية جايه أساسا من بطل *
ضربه ترد الروح فيا خلتني أقوي م الجبل *
والنصره جايه وبهيه قالت يا مرحب بالبطل *
ترحب بيك كل الدنيا جايا الوفود بك تحتفل *
مصر ما تهونش عليا داق العدو كاس الفشل *
يارب سهلها عليا وعلي كل مصري أو بطل *
وكل أيامنا الجايه خليها سمن علي عسل *
مصر دي أم الدنيا ما تخلا أبدا من بطل *
**** **** **** **** ****
بقلم أ / عبد الرحمن فتحي الحناوي .
من / مصر .
***************************