يا حلوة لا تتلبكي****بقلم المبدعة /// د. ملك محمود الأصفر

ياحلوة لا تتلبكي
...............................
قال لي
ياحلوة لا تتلبكي
وانسي الأسى وانسي البكي
أنا وانت وليالي الهوى
رح سمعك أجمل حكي
جايي لعندك يا أنا
جايب معي كل الهنا
بهديكي عطر السوسنا
بس انت يا حلوة اضحكي
........................
عم إحلم بليلة سمر
تحت السما بضو القمر
نمشي سوى تحت الشجر
وكفوفنا متشابكي
تعي على صدري اتكي
واسمعي صوت التكتكي
يا قلبي لعيونك أنا
رح إبني أجمل مملكي
.........................
موسيقى مغنا ودندنا
ورقص وعتابا وميجنا
ورح خلي أيامك هنا
وصبايا رح ترقص لكي
يا حلوتي ما أجملك
سبحانو ربي الجملك
بالحب بدي غازلك
واقطف ورود الليلكي
........................................
د . ملك محمود الأصفر