#من_ديوان_الحناوي
بشعر العامية المصرية .
( يا كورونا .. كفايه كده ) .
----------------------------
قعدت الناس في البيت
وساب الفلاح الغيط
وهناك رشت عالحيط
الست كلور في البيت
اصلك يا كورونا فظيع **
العامل ترك المصنع
وقعد لاخبارك يسمع
إرحل علشان يرجع
من تاني ينتج يبدع
أصلك يا كورزنا فظيع **
الشارع أصبح خالي
والبيت دايما يحلالي
أتباهى فيه بالغالي
إصلح لي يارب حالي
أصلك ياكورونا فظيع **
ياكورونا روح لبعيد
مهما نقول ولا نعيد
خطرك دا علينا شديد
بطلنا سلام بالإيد
أصلك ياكورونا فظيع **
ستاتنا دايما شاطره
حطاك في البال وفاكره
لو حتى فيه مخاطره
عامله حسابها ومذاكره
اصلك يا كورونا فظيع **
نلبس قفاز وكمامه
ونعيش بألف سلامه
ولا تظهر أي علامه
علينا ونقول يا ندامه
أصلك ياكورونا فظيع **
إسمع كلام الطبيب
ما تاخدش علاج غريب
خليه هوا اللي يجيب
دا الفيروس خطره رهيب
اصلك يا كورونا فظيع **
إرفع إيديك وقول
يارب يروح ويزول
فيروس كورونا دا غول
اغسل إيديك ب (ديتول )
اصلك ياكورونا فظيع **
خليك في البيت مستني
ما تقولشي انا خاب ظني
وكورونا دا قرب مني
إحذر واياك تسألني
اصلك يا كورونا فظيع **
لو ظهرت حاجه عليك
والفيروس مس إيديك
إبعد عمن حواليك
وادعي ربنا يحميك
اصلك يا كورونا فظيع **
أزمه وبكره هتعدي
والموت يبعد ويهدي
وحياتنا تبقى وردي
عقمنا البيت من بدري
أصلك يا كورونا فظيع **
خليك حاذر وحريص
يا ابن البلد يا نفيس
وابعد عن أي ونيس
لتعيش عمرك تعيس
أصلك يا كورونا فظيع **
حارب كورونا وقدر
حصن جسمك كدا أكتر
واحبس نفسك ولا تظهر
دا الفيروس مش بيهزر
أصلك يا كورونا فظيع **
ربك عالم بالحال
والفيروس دا قتال
وما كانش ف يوم عالبال
توب يلا وعيش بحلال
اصلك يا كورونا فظيع **
**** **** **** ****
بقلم د / عبد الرحمن فتحي الحناوي .
الأربعاء ٢٥ من مارس سنة ٢٠٢٠
*************************